احلى رمضاان فى حياتى(ازاى استمتع برمضاان )

االسلام عليكم ورحمة الله

ااهلا بحضراتكم ، واهلا برمضان معانا السنادي

هندخل مع بعض مباشرة في الموضوع ان شاء الله

االفكره جاتلي اني اكتب عن ازاي استمتع بجد برمضان أسهل أسهل أسهل طريقه

كلها حاجات عمليه ودايما بنعملها وهي اللي هنعلى بيها ايمانيا جدا في رمضان وبعد رمضان

تعالو نقسمها ونعملها عناصر

اولا : الصلاة

اللي هنعمله مع بعض هو اننا بس هناخد بالنا من 3 حاجات خفاف قوي

1- اللحظة الاولي في الصلاه

قبل رفع الايد بالتكبير هقف لحظه وادخل جوا نفسي واركز قوي اني واقف بين ايد ربي ، وعلاقة جديده هتحصل حالا .

2- الهدوء في قراية الفاتحه

اقراها بهدوء ، واقف بين الايات وقفه اتوعب فيها الايه اللي قلتها ، واستشعر حديث ( اذا قال العبد الحمد لله قال الله : حمدني عبدي ..... الحديث )

3- ختام الصلاة

مش هقلب التسبيح اللي بعد الصلاه ، لكن ههدا قوي وانا بقوله ، واحس بمعنى سبحان الله ، ومعنى الحمد لله ، ومعني الله اكبر ، ولا اله الا الله .

ثانيا : القرآن

بما اننا عارفين ان رمضان شهر القران فخدوا مني الوصايا دي ، والطريقة الجديده دي في قراية القرآن :

*** ابدأ بتجديد الصله بالله ( يعني يكون جواك قبل ما تبدأ : يارب انا هقرأ دلوقتي عشان ارتفع عندك ومعاك )

*** لما تمر بايات الرحمة عيش الرحمة والشوق ليها وكذلك الجنة ، ولما تمر باية العذاب ابكي او تباكي او خوف نفسك وكررها لحد ما تعيشها ويستقر معناها في قلبك .

*** اقرا كلام ربنا وانت جواك ان ربنا منزلهولك لوحدك .

*** اقرا القران السنادي ( بالحب ) .... يعني ايه ؟

يعني خد كل القران على محمل ان ربنا بيحبنا وان القران كل قايم على الحب في كل اياته ، بمعنى

-- لما تمر على اسم من الاسماء الحسنى اعرف تماما ان ربنا بيعرفنا بنفسه ، ااااااااالله على الاحساس ده لما تحسه

ربنا العظيم بيعرفني بيه ، لانه بيحبني

*** عايز تفهم القران بص بتركيز على اخر الايه وازاي ربنا بيختمها ، يعني لو قال والله غفور رحيم يبقى اول الايه كان بيتكلم عن مظاهر رحمته بينا .

-- لو مريت على قصه من قصص السابقين افهم تماما انهم فريقين ( فريق أحب ربنا ففرحهم بحبهم ليه ، وقصص العذاب والاهلاك اعرف انهم ناس محبوش ربنا ولا حبه ملأ قلوبهم فاستحقو بد رحمته بيهم انه يعمل معاهم كده ، وما ربك بظلام للعبيد )

*** من أهم النقط اللي بتحببنا في القران وتحسن علاقتنا بيه ، اننا نكتب خواطرنا حوالين الآيات او نسجلها

وخد بالك في البدايه هتبقى محرج ومكسوف والشيطان هيحاول يخليك متعملش كده لانه عارف اهميتها على القلب قد ايع .

لكن بعد كده هتحب الموضوع ده قوي ، وهتحب البعد عن الناس والاختلاء بالقران واهم من ده كله هتحب ربنا ، وهو هيكافئنا بلذه ملهاش وصف .

*** اعمل الطريقه التربويه الرائعه في الاستفاده بالقرآن ، اللي هي ايه ؟؟

-- اقرا الايه ،

-- شوفها بتتكلم عن ايه

-- طلع الدروس المستفاده منها على قد ما فهمت وحسيت .

-- اطلع من الدروس دي بواجبات عمليه وطبقها مباشرة .

هتحس باحساس رائع ،

وخد بالك هو ده بالظبط المقصود بالعمل بالقران ، اللي هتتميز بيه حضرتك وهنرفع بيه امتنا . ويكون بيه القران قائدنا للجنة .

شبهه هيرميها الشيطان جوايا ، هيقولنا ايه ؟

طب مانت كده ممكن متقراش غير ايات قليله في الوقت اللي فلان صاحبك عمل ست سبع ختمات

فتجاوب عليه وتقوله :

1- العبره مش في الكتره ( لان العدد في الليمون يا شوشو )

اما احنا فثوابنا في التدبر اكبر بكتير من ثوابنا في السرعه بالقرايه ( والموضوع من الاساس هو تجميع حسنات اكبر ) يعني من الاخر : كان غيرك اشطر يا شوشو يا لعين .

2- كمان الاحاسيس اللي هنحسها والدروس اللي هنطلع بيها والخواطر اللي هنكتبها هي اللي القران بيصلح قلوبنا وكل حياتنا بيها .

3- عبد الله بن عباس قال : لو قمت الليل كله بايه احسها ، احسن عندي من قراية القران كله من غير ما احسه .

3- الاثر بيقول : ان ثواب الايه بتدبر يوصل الحرف بيه ل 700 حسنه واضرب في عشره ، يعني الحرف بسبع تلاف حسنه / واحنا عارفين ان الحرف بالقراءه العاديه بحسنه واضرب في عشره يعني 10 حسنات بس يا ولداه

كفايه كده النهارده ، وان شاء الله نتابع كلامنا الخفيف ده مع الذكر ، ونماذج من الناس اللي حبو ربنا بقلوبهم

جزاكم الله خيرا ، ورمضان عظيم

وكل سنه واحنا في قرب من ربنا

وكل سنه وربنا بيحبنا

ووحوي يا وحوي ـ ايوحه